يـاصقـر

ضاق صدري يا صقر بالحيل ضاقي
                                   والحقيقه مـا حسبـت أنـه يضيـق
لين شفت اللي طرق بـاب النفاقـي
                                    حالـف ألا يقلـب الدنيـا حـريـق

من بدايـة خلقتـه راعـي شقاقـي = كلمتـه ينحـر بهـا وجـه الرفيـق
كم وكم سـوا مـع العالـم سباقـي = مـادح العـدوان شمـات الصديـق
قلبه أسـود لا يطيـق ولا يطاقـي = لـو نجيلـه كيـف يسحنـا دقيـق
كنت أعـده راس حربـه فالتلاقـي = وأثـره اللـي ناكبـاً كـل الفريـق
الأفاعـي جلدهـا قالـوا رقـاقـي = بس جوف الجلـد بـه سـمً لصيـق
تخرج المقروص عن حـد النطاقـي = ويمكن أنه مـن سببهـا مـا يفيـق
رجهـا بالرمـح قبـل الأنطلاقـي = وأرمها فـي غبـة البحـر الغريـق
ما يتوب الثور عن حرث المساقـي = ولايتوب الفار عن صـوت الطقيـق
والفراق أخير مـن بعـض التلاقـي = كان مـا فالحاضـرة قلـبً رقيـق
وأن بليـت بمـن يحبـون النهاقـي = مايجفلنـي تـرا صـوت النهـيـق
لي لسـانً بالحكـي بالحيـل راقـي = وفي ضميري كلمةً تصفـق صفيـق
عادتي ما احـب درب الأصطفاقـي = لا مشيت أمشي وأنـا حـرً طليـق
ما يجوز البيت مـن دون الرواقـي = ولا يباع الحر فـي سـوق الرقيـق
ولا حداً يـدري بعمـره كـم باقـي = ولا حـداً يفتيـك بالعلـم الوثـيـق
الوكـاد إنـا بهـا الدنيـا طراقـي = وكل نفـسً ذايقـة طعـم الزهيـق
الأوادم عانهـا تمـشـي سيـاقـي = للمقابـر صلحـوا درب وطـريـق
ودامك أنت حـي يالقلـب الرقاقـي = مـا عليـه مـن مكثـرة الصفيـق
يا عسل يا طيب يـا حلـو المذاقـي = يا زهر يا ورد يـا طعـم الرحيـق
يـوم مـات العـود باقيلـه بواقـي = ودكـم بالقلـب لاصقبـه لصـيـق
حطني بينك وبيـن الشمـس واقـي = أحتملهـا لـو غـدا دمـي دفـيـق
يوم أشوف الشيب في عارضك ساقي = زاد جرحي يا صقر جـرح عميـق
وقالوا أن الكارثـة وسـط العراقـي = قلـت لا لا شالهـا وادي العقـيـق